ركبوني مرجحتي..عايز أركبها لوحدي
معلش بقى هكتب التدوينة دي
باللغة العامية واخلي البساط أحمدي زي ما بيقولوا...
عنوان الاغنية الشعبية اللي
اخترته بدون اى تعديل عنوان للتدوينة بقى شعار المرحلة فعلا..
كل واحد مقتنع انه لوحده صح..
انه لوحده عايز مصلحة البلد...
اى حد تاني بيقول كلام غير اللي
بيقوله يبقى عميل وخاين ومجرم وكافر كمان...
او على اقل تقدير يبقى مغيب ومش
فاهم وجاهل ومنساق..
منطق عجيب !!
وصلت لدرجة ان واحدة من صديقاتي
كانت كاتبة بوست طويل بيقول ان مينفعش نخون ونتهم بعض ولازم نتعلم نختلف مع بعض
وردت عليها واحدة بتأيدها وتقولها عندك حق والحل الوحيد اننا نعمل كذا كذا واللي
مش عاجبه يولع بقى !!!
طب انا مش عايز اتناقش مع سيادتك او
احاول اقنعك ان دماغك الألماظات دي مش هي الوحيدة اللى عندها قدرة على التفكير
والتحليل واتخاذ القرار يعني...
بس ممكن تفهمني ازاي هتقدر تخلي
دماغ الناس زي دماغك؟!
طب ازاي هتنفذ اللي انت عايزه والناس مش عايزاه؟!
ما هو انت اما هتفضل مقتنع بأرائك وتشوف غيرها بيتنفذ وانت بتمصمص في شفايفك وتقتنع ان الناس كلهم اغبية وانت عشان بتفهم بيضطهدوك...
أو هتجبر(او حتى تحاول تجبر) اللي حواليك ينفذوا كلامك..
يعني لـ هتعيط عشان تركب المرجيحة
اللي انت شايفها مرجيحتك لوحدك..
او هتضرب اللي راكبها وتركبها غصب عنه...
طب مش جاي في بالك خالص بنقول
للأطفال ايه في الحالات دي؟!!
ألعبوا مع بعض متتخانقوش...
اتعايشوا يا بشر...
وعمرك ما هتعرف تتعايش مع جارك غير لما تقتنع ان الحق والباطل نسبي...
الصح والغلط نسبي...
اقتنع باللي انت عايزه بس اوعى تبص للى مختلف معاك على انه مش بيفهم ومش بيفكر او السهل جدًا تقول عليه عميل وخاين...
افصل بين الوقائع وبين الاستنتاجات والتحليلات حتى البديهية من وجهة نظرك..
كسر كل اصنام البشر... حرر عقلك وفكر...
متدورش على الاجابات الجاهزة..
متدورش على التحليل الخزعبلي للمؤامرة الكونية...
بطل تدور على التوقعات بتاعه ليلة الامتحان..
بطل تريح دماغك..
فكر واتعب في تكوين وجهة نظرك..
وبعد ما تتعب وتقتنع بفكرة وتؤمن بيها..
اعرف انها نتاج تفكيرك ودماغك..
وتفكير غيرك مش زيك...
غيرك هو كمان فكر وكون وجة نظر مخالفة...
وكما قال صديقي :
الحوار هو أفضل الطرق للوصول للرقي.. وبالحوار وحده يمكنك إقناع غيرك بهذا...
0 comments:
Post a Comment