دماغي كدة

بسم الله نفتتح البلوج ونرش مية ونقول يا هادي..

عشان بس نبقى واضحين...

أنا لا مدون ولا صحفي ولا كاتب...

أنا لسبب أجهله عايز أكتب...

عايز أخترع متنفس جديد أقول فيه رأيي اللي ممكن - أو غالبًا - ميهمش حد...

وزي ما قال عبد الناصر على الاستاذ أحمد بهاء الدين :

اتركوه ؛ نحن راقبناه ، وندرك أنه لا علاقة له بأحد .. هذا رجل "دماغه كده" ..

وزي ما الاستاذ أحمد خالد توفيق اختار نفس الاسم - دماغي كده - عنوان لكتاب بيجمع مقالاته...

فأنا قلت يا واد أنت كمان سمي البلوج "دماغي كده"..

وبغض النظر عن الفرق الشاسع بين دماغي ودماغ الأساتذة اللى ذكرتهم الاسم مناسب جدًا للى ناوي أكتبه...

البلوج ده مش عن موضوع معين..

مينفعش تصنفه سياسي ولا ساخر ولا ترفيهي ولا حتى رومانسي..

البلوج ده بيعبر عن حالتي أنا ودماغي أنا مش أكتر..

أخر حاجة بقى:

لو حظك ونصيبك وقع البلوج ده تحت ايدك..

فمن حقك تقرر تقرى او تقفله من باب "بلا قرف"..

ومن حقك تتفق او تختلف مع كل اللى مكتوب او جزء منه..

ومن حقك تعترض وتتناقش براحتك..

الألتزام بالأدب عند الأختلاف هو الشرط الوحيد..

دماغي كده